أبي أشعل شموع الحب وبأعطي من الغلا بستان

أبي أبگي من الضيقة وأعزف للهموم ألحان
أبي أطلق مواويل الحزن وبطرح گل دواويني
أبي أشگي أبي أحگي أبوصف للبشر حرمان
أبيهم گلهم يدرون أبيهم يشعروا فيني
أبي لا من طرى اسمي بگى من لوعتي شيبان
أبي لامن طرى"عاشق" ذگر من گان يغليني
أبيهم يذگرون أني صرت بدمعتي غرقان
أبيهم يعرفون الهم هو اللي صار يخاويني
أبي أصرخ و أبلغهم و أقول أن الفرح خوّان
يجي مرة معاي و هو طول العمر ناسيني
أبي اترگ لهم قصة و أخيّرهم على العنوان
يسمّوا "حزن "يحطوا "دمع" ،ما عاد يعنيني
أبي لامن وصل صوتي يحس بضيقتي إنسان
أبي لامن نزف جرحي لقيت اللي يداويني
أبي شخص يجي يمي و يقفل للعنا بيبان
أبيه يگون لي خلٍ وعلى حزني يواسيني
أبيه لمرگبي مرسى وأبيه لغربتي أوطان
أبي لامن ذرفت الدمع لقيته لي يعزّيني
أنا ما أبيه يصبح ضلع أبيه يگون لي ضلعان
أبي لا من مشيت وطحت يحط يديه في يديني
أبيه لامن خانني التعبير يگون لي لسان
أبي لامن سگتْ ألقاه ،يفهمني من نظر عيني
أبي لا من تعبت وضقت يلم الروح بالأحضان
أبيه يگون لي گتاب إذا ضاعت عناويني
أبي أعشق وأبي أغرم وببني للهوى بنيان
أبيه يگون مبنى ضخم و يسگن فيه مغليني
أبي واحد يسگن بي و أبطرد لأجله السگّان
أبي يسگن وسط قلبي وعمره ما يخليني
أبي أشعل شموع الحب وبأعطي من الغلا بستان
أبي أهديه باقة ورد ،مسقيها شراييني